Демократската унија за интеграција (ДУИ) изрази длабока загриженост поради застојот во процесот на преговори за членство во Европската Унија. На прес-конференција, потпретседателот на партијата, Арбер Адеми, нагласи дека Македонија заостанува зад регионот, додека Црна Гора и Албанија бележат напредок.
„Северна Македонија, и покрај напорите и реформите направени со години, продолжува да остане блокирана без отворени или затворени поглавја“, изјави Адеми.
Според ДУИ, оваа ситуација е резултат на „блокирачките политики, неспособноста и недостатокот на искрена волја од актуелната влада“, која не планира да ги спроведе уставните измени.
Адеми го обвини движењето „ВРЕДИ“ дека лажело пред изборите, тврдејќи дека нема да влезат во Влада без уставни измени. Тој додаде дека оваа состојба ја загрозува европската перспектива на земјата и аспирациите на граѓаните, особено на младите.
ДУИ повикува на итно забрзување на чекорите кон отворање на преговарачките поглавја и отстранување на опструктивните политики. Партијата нагласи дека се залага за транспарентен ангажман во насока на постигнување на стратешката цел на земјата – полноправно членство во ЕУ.
„ДУИ секогаш ќе биде на страната на граѓаните и на европската иднина на Северна Македонија, како единствен пат што гарантира стабилност, безбедност и развој за сите“, порача Адеми.
