Претседателот на Милан, Паоло Скарони (78), најави дека Интер и Милан до 2031 година ќе добијат нов, модерен стадион, кој ќе биде најдобар во Европа и гордост на градот.
Проектот, наречен „Катедрала“, е инспириран од градските знаменитости како Дуомо и Галерија Виторио Емануеле. Стадионот ќе има капацитет од 60.000 седишта, а внатрешната структура е дизајнирана да ги приближи гледачите што е можно поблиску до теренот.
Општина Милано го одобри планот за ревитализација на квартот Сан Сиро, кој предвидува:
- Трансформација во пешачка зона со 110.000 квадратни метри зелени површини.
- Преместување на паркинзите под земја, со што ќе се ослободи 40% од сегашниот простор.
- Изградба на бесплатни или субвенционирани спортски и рекреативни објекти.
Секторскиот комитет на Градскиот совет на Милано веќе даде зелено светло за купување на земјиштето на кое се наоѓа сегашниот стадион „Џузепе Меаца“. Двата клуба ќе треба да платат 197 милиони евра за земјиштето.
Се проценува дека изградбата на новиот стадион ќе чини околу една милијарда евра. Сè уште не е одлучено дали сегашниот стадион „Џузепе Меаца“, со капацитет од 75.000 гледачи, ќе биде делумно или целосно срушен.
Рокот за завршување на проектот е поставен за 2031 година за стадионот да може да биде домаќин на натпревари од ЕУРО 2032.
