Земјотрес со јачина од 4,8 степени според Рихтер е регистриран утрово, кратко по 4 часот, во морскиот дел кај Света Гора. Епицентарот бил на девет километри северозападно од Кареја, а потресот бил почувствуван во поширокиот регион. Не е пријавена материјална штета.
Претседателот на Организацијата за планирање и заштита од земјотреси, Ефтимиос Лекас, изјави за грчката државна телевизија ЕРТ дека самиот земјотрес не предизвикува загриженост, но научниците се загрижени поради „чудниот феномен што опстојува веќе 18 месеци“.
Според Лекас, сеизмичката активност во регионот започнала на почетокот на 2024 година и досега вклучува над 1.000 земјотреси. Денешниот потрес е десетти по ред со јачина поголема од четири степени. Најсилниот земјотрес бил пред три месеци, со јачина од 5,2 степени.
Лекас објасни дека станува збор за расед што се активирал во 2024 година и сè уште има енергија, но тој очекува дека нема да достигне ниво повисоко од 5,2 степени.
