Тренерот Игор Јакимовски официјално го најави учеството на македонскиот маратонец Дарио Ивановски на „Ви Зер Скопски Маратон 2025“. Ова ќе биде јубилеен, 10-ти настап на Ивановски на најголемиот атлетски настан во Македонија.
Јакимовски истакна дека одлуката е донесена и покрај тоа што настапот се случува само три недели по Светското првенство во Токио, бидејќи за Ивановски „трчањето во епицентарот на нашата национална атлетика е повеќе и над сè“.
Ивановски ќе настапи во дисциплината маратон, која е и балканско првенство. Ова ќе биде негов 54-ти репрезентативен настап за Македонија.
Досегашниот биланс на Ивановски на Скопскиот маратон е:
- Четири пати трчал полумаратон (2016, 2017, 2018 и 2019).
- Пет пати трчал маратон (2020, 2021, 2022, 2023 и 2024).
Има освоено три победи во полумаратон и една победа во маратон, во 2021 година.
Јакимовски нагласи дека трчањето на Скопскиот маратон е посебен момент за Ивановски, а домашната публика повторно ќе може да го види најдобриот балкански маратонец.
