Кандидатот за градоначалник на Гази Баба од СДСМ, Влатко Митовски, на прес-конференција истакна дека општинската програма за овие локални избори е направена врз основа на маалските средби и разговорите со граѓаните.
„Гази Баба денес се дави во безредие, хаос, нехигиена, диви депонии и градежно беззаконие. Таква општина повеќе не смее да продолжи“, изјави Митовски.
Тој најави дека доколку победи на изборите, во неговиот четиригодишен мандат Гази Баба ќе добие модерен и урбан лик. Како дел од клучните проекти, Митовски ги наведе:
Решавање на проблемот со кучињата скитници: Општината ќе добие сопствен стационар за да стане прва со нула кучиња скитници.
- Изградба на спортски сали и затворен базен.
- Реновирање на домовите за култура со кино-сали и летно кино на отворено.
- Поставување атмосферска канализација и асфалтирање на улиците каде што е потребно.
- Конечно решавање на проблемот со недостиг на питка вода.
- Дел од буџетот секоја година ќе го креираат самите млади, според нивните идеи и приоритети.
- Субвенции од 50% од котизацијата за тезгите со цел да се намали бројот на диви пазарџии.
Митовски нагласи дека граѓаните повеќе не треба да бидат „изиграни“ и верува дека ќе ја поддржат визијата за чиста, урбана и модерна општина.
