Планинската спасителна служба (ПСС) Охрид вчера, околу 18:30 часот, добила повик од група параглајдеристи на Галичица за нивен пријател, државјанин на Германија, кој доживеал тежок пад од голема височина. Несреќата се случила на исклучително непристапен и карпест терен.
Од ПСС информираат дека имале голема среќа бидејќи тројца нивни спасители во тој момент престојувале во планинарската куќа „Спиридон“, каде што е лоцирана и нивната спасителна станица.
- Екипата пристигнала на местото на несреќата за само 15 минути.
- Веднаш била извршена имобилизација на повредениот, по што започнал комплексен транспорт по стрмен и тежок терен.
- Акцијата била отежната поради ноќните услови.
По повеќе од еден час напорна интервенција, во 20:20 часот, повредениот бил безбедно спуштен до асфалтниот пат кај превојот Баба и предаден на екипа на Итната медицинска помош од Охрид.
За жал, на параглајдеристот во Специјалната болница „Св. Еразмо“ му биле констатирани фрактури на пет пршлени во долниот дел на рбетот.
