Вечерва е подметнат пожар во депонијата близу Арачиново, која се наоѓа покрај стариот пат кон Куманово, информира Дирекцијата за заштита и спасување (ДЗС).
Од ДЗС соопштија дека иако депонијата има ограда и влезна врата, скопските пожарникари ја затекнале вратата отворена. Во депонијата имало фрлена поголема количина пакуван сончоглед кој горел со силен пламен, заедно со други горливи производи.
Се претпоставува дека намерно запалениот сончоглед го предизвикал опожарувањето на дел од депонијата. Поради насоката на струењето на воздухот, смрдеата од пожарот најверојатно се чувствува во одредени делови на Скопје.
Од ДЗС велат дека гаснењето ќе биде сложено поради големиот обем на зафатената површина. Поради тоа, се прави проценка на неопходноста од затрупување на депонијата, која е под надлежност на Општина Арачиново.
