Поранешниот британски премиер Тони Блер е вклучен во разговори на високо ниво за потенцијално предводење на преодна влада во Газа, доколку се постигне прекин на огнот меѓу Израел и Хамас, објави Би-Би-Си.
Блер, кој ја предводеше Велика Британија за време на војната во Ирак во 2003 година, учествува во дискусии со сите засегнати страни за да се стави крај на војната и да се планира идната администрација на палестинските територии.
Во центарот на најновиот предлог, кој оваа недела го дискутирале американскиот претседател Доналд Трамп и арапските лидери во ОН, е идејата Газа да биде управувана од преодно тело. Ова тело би било поддржано од ОН и земјите од Заливот, пред власта да им се врати на Палестинците.
Една од опциите е Блер да ја предводи оваа преодна влада, иако неговата канцеларија нагласи дека тој нема да поддржи ништо што би ги протерувало жителите на Газа. Во август, Блер присуствувал на состанок во Белата куќа со Трамп за повоените планови за Газа.
По напуштањето на функцијата во 2007 година, Блер помина неколку години како пратеник за Блискиот Исток за Квартетот на меѓународни сили, фокусирајќи се на економскиот развој на Палестина и решението со две држави.
Разговорите за улогата на Блер доаѓаат откако палестинскиот претседател Махмуд Абас изјави дека е подготвен да соработува со Трамп и други светски лидери за спроведување на мир со две држави.
Абас ја отфрли идната улога на Хамас во управувањето со Газа и побара нивно разоружување.
Претходно оваа недела, Велика Британија, Канада и Австралија официјално ја признаа државата Палестина. Овој дипломатски потег беше остро критикуван од Израел и САД како „награда за Хамас“.
Овој конфликт започна по нападот на Хамас врз јужен Израел на 7 октомври 2023 година, во кој загинаа околу 1.200 луѓе. Оттогаш, во израелските напади во Газа се убиени најмалку 65.419 луѓе, според тамошните здравствени власти. Комисијата за истрага на Обединетите нации неодамна изјави дека Израел врши геноцид врз Палестинците, што Израел го негира.
