Генералниот секретар на СДСМ, Александар Саша Димитријевиќ, на предизборниот собир на СДСМ и Коалицијата во Конче, изјави дека со доаѓањето на власт, ВМРО-ДПМНЕ го „запре напредокот“ на општината, оставајќи зад себе „пустош и хаос“ и неостварени ветувања.
Димитријевиќ нагласи дека Благој Илиев, кандидатот за градоначалник, не само што ги знае проблемите на Конче, туку ги има и решенијата, и е подготвен да го врати развојот започнат пред 2021 година.
„Нашиот кандидат Благој Илиев е човек со визија, енергија и чесност. Тој веќе покажа дека знае како да решава проблеми и да работи во интерес на граѓаните. Затоа на овие избори да му дадеме поддршка – за да имаме вистинска грижа за сите нас. Да гласаме за него, затоа што нашиот дом Конче заслужува повеќе,“ повика Димитријевиќ.
Генералниот секретар ја истакна основната порака на СДСМ, нагласувајќи дека партијата се бори за ред и правда, за достоинствени плати и пензии, за млади кои остануваат, и за општини кои се отворени и вистински сервис на граѓаните.
Димитријевиќ порача дека СДСМ е продолжение на „најсветлата традиција на Македонија“ – борбата за слобода, рамноправност и достоинство.
„Нашите корени се во АСНОМ, во генерациите што ја поставија темелната вредност: државата да биде дом за сите… Се бориме за држава што не е ничија приватна сопственост, туку заеднички дом со правила што важат за сите,“ заклучи тој.
