Министерството за внатрешни работи (МВР) информира дека на 1 октомври 2025 година, полициски службеници од СВР Куманово го лишиле од слобода Б.К. (32) од Куманово.
Тој бил баран по потерница врз основа на судска наредба поради постоење сомневање за сторено кривично дело „демнење“ по член 144-а од Кривичниот законик. Според пријавата, тој подолго време следел и вознемирувал 28-годишна девојка од Куманово.
Девојката го пријавила случајот во СВР Куманово на 9 април 2025 година, по што од страна на судија од Основен суд Куманово му била изречена мерка за претпазливост за недоближување.
По преземени мерки, Б.К. вчера е пронајден и лишен од слобода, а во службен разговор го признал делото. Од МВР информираат дека по целосно документирање на случајот, против него ќе биде поднесена соодветна пријава.
