Кандидатката за градоначалничка на Град Скопје од СДСМ, Каја Шукова, ја посети Општина Бутел каде разговараше со жителите за долгогодишните проблеми со јавниот превоз, констатирајќи дека „Бутел не е далеку од центарот, но е далеку од основните услови за достоен градски живот“.
Шукова истакна дека е свесна за реалноста на бутелчани: недостиг од соодветни автобуски линии, ретка фреквенција, пренатрупани автобуси и лоша поврзаност со остатокот од градот. Таа нагласи дека ова претставува „урбана неправда“ која мора да се промени.
„Секоја мајка што со дете чека автобус на сонце, секој пензионер што оди пеш до центар зашто нема превоз, секој млад човек што размислува да се исели тоа е лице на една урбана неправда. И тоа мора да го промениме,“ истакна Шукова.
Како клучно решение за проблемот со транспортот, Шукова го посочи воведувањето на системот Брз автобуски превоз (БРТ). Таа најави дека втората фаза од БРТ проектот го вклучува правецот север-југ, со што директно ќе се поврзат населбите од Бутел со централното градско подрачје.
Според неа, БРТ не е само прашање на транспорт, туку и прашање на социјална правдина, достапност и еднаков третман за сите скопјани.
„БРТ не е само прашање на транспорт. Тоа е прашање на социјална правдина, достапност и еднаков третман за сите скопјани. Бутел мора да добие свое место на градската мапа, не само географски, туку и функционално,“ додаде таа.
Покрај БРТ, Шукова најави и:
- Модернизација на возниот парк.
- Нов возен ред.
- Воведување на приоритетни ленти.
Подобра поврзаност со клучните здравствени, образовни и економски центри во Скопје.
„Не зборуваме за луксуз, зборуваме за основни услови за живот. Јавниот превоз мора да биде предвидлив, безбеден и достапен“, заклучи Шукова.
