Кандидатот за градоначалник на Општина Чаир од коалицијата ВЛЕН, Изет Меџити, заедно со кандидатот за општински советник, Аритон Рама, го претставија еден од клучните приоритети во нивната програма: изградбата на Младински центар посветен на развој, креативност и иновации за младите.
Меџити го истакна значењето на овој проект, нарекувајќи го своја визија за „модерен, напреден и кон иднината ориентиран Чаир“.
„Чаир располага со големо младинско богатство, талентирани млади девојки и момчиња со исклучителен потенцијал, кои заслужуваат повеќе од зборови – заслужуваат можности, поддршка и простор за развој. Затоа изградбата на Младинскиот центар ќе биде апсолутен приоритет на мојот мандат како градоначалник. Ова не е само физички објект, туку платформа каде нашата младина ќе може да учи, да создава, да се изразува и активно да ја гради својата иднина“, изјави Меџити.
Кандидатот за советник, Аритон Рама, ги опиша деталите за просториите на објектот, кој ќе биде изграден на четири функционални нивоа:
Библиотека и сала за предавања за учење, истражување и културни настани.
Дигитален центар со лабораторија за вештачка интелигенција, бесплатни обуки по програмирање и дигитална писменост, како и простор за стартапи и младинско менторство.
СТЕМ Академија која ќе нуди обуки во областа на технологијата, науката, уметноста и математиката.
Простории за театар, советување и креативни активности: Каде што младите ќе можат слободно и без бариери да се изразуваат.
Меџити и Рама гарантираат дека со овој проект, Чаир ќе стане центар на иновации, образование и младинска креативност.
