Кандидатот за градоначалник на СДСМ во Свети Николе, Дејан Гичев, одржа трибина на која ја критикуваше актуелната власт на ВМРО-ДПМНЕ за нереализирани проекти и стагнација во градот. Тој побара поддршка од граѓаните, ветувајќи дека ќе му го врати сјајот на Свети Николе.
„Поминаа четири години откако ДПМНЕ е на власт, а освен празни ветувања, не добивме ништо. Четири години без ниту еден капитален проект, освен чадорите и кафезот во срцето на градскиот парк, кои ќе бидат дислоцирани веднаш по моето доаѓање, во првата недела“, порача Гичев.
Тој нагласи дека градот стагнира, нема привлечено инвестиции, а граѓаните добиле повисоки сметки и пониски стандарди. Како пример за неработење, Гичев го посочи проектот за базен, кој бил целосно подготвен, но бил сопрен од раководството на ВМРО-ДПМНЕ без никакво објаснување.
Гичев вети дека со напорна и чесна работа ќе ја реализира својата програма.
„Со правилно урбанистичко планирање и грижа за хигиената, Свети Николе ќе го направиме чист, урбан и модерен град за живот. Тоа ќе биде обврска на секој од нас“, рече кандидатот.
Меѓу конкретните ветувања на Гичев се:
Обновување, модернизирање и вложување во спортските објекти, како и поддршка на спортските клубови.
Вистинска поддршка за земјоделците, преку тампонирање на сите земјоделски патишта за обезбедување основни услови за работа.
Нов младински центар за младите.
Фонд за самохрани мајки за социјално ранливите.
Стипендии за талентирани деца во образованието.
Гичев заклучи дека ВМРО-ДПМНЕ ја прокоцкале можноста, а градот стагнирал. Тој вети дека ќе биде градоначалник кој секојдневно ќе биде на терен и достапен за сите. Ги повика граѓаните на 19 октомври да го заокружат бројот 5 за да донесат нова позитивна енергија и прогрес во Свети Николе.
