Министерството за здравство ја информира јавноста дека започна со работа Оперативна група и придружни работни подгрупи, чија цел е унапредување на одговорот на здравствениот сектор на насилство врз жени, девојчиња и деца.
Оваа група, формирана согласно надлежностите од Законот за заштита од насилство врз жените и семејно насилство, има за цел да ја зајакне испораката на здравствени услуги и капацитетите на здравствените работници, во согласност со стандардите на Светската здравствена организација (СЗО) и препораките на ГРЕВИО.
Задачи на работните подгрупи
Оперативната група ќе ги координира и имплементира активностите на четири главни работни подгрупи:
Изработка на Национална програма за зајакнување на одговорот на здравствениот сектор на насилство.
Изработка на клиничко упатство/протокол за здравствени работници.
Развој на програма за почетна и континуирана медицинска едукација.
Прибирање податоци за жени жртви на родово базирано насилство и семејно насилство.
Координаторот на Оперативната група има можност да покани експерти и претставници од широк спектар на институции, со цел обезбедување дополнителна експертиза. Овие институции вклучуваат, меѓу другите:
Министерствата за здравство, внатрешни работи, правда, образование и труд и социјална политика.
Јавно/основно обвинителство и Дирекција за е-здравство.
Институтот за јавно здравје, Центрите за јавно здравје и Институтот за мајка и дете.
Универзитетски клиники, Медицински факултет и Здравствени домови – Итна медицинска помош.
Црвен крст, здруженија на лекари и медицински сестри, граѓански организации (НВО) и Агенции на Обединетите нации.
Членовите на Оперативната група се именуваат на период од три години, а групата ќе се состанува најмалку два пати месечно. Извештаи за работата ќе се поднесуваат до министерот за здравство на квартално и годишно ниво, а ќе бидат споделени со релевантните институции и јавноста.
