По повод 5 октомври – Меѓународниот ден за образование, кандидатот за градоначалник на Општина Чаир, Бујар Османи, одржа тематска прес-конференција, посочувајќи ја како главен проблем алармантната состојба со ограничените и лоши капацитети, особено за предучилишна возраст.
Османи нагласи дека образованието ќе биде негов приоритет број еден, бидејќи „нема поголем приоритет за една општина отколку квалитетно образование“.
Османи ја критикуваше состојбата во Чаир: „Во Чаир недостасуваат градинки. Градинките се преоптоварени, родителите сами купуваат основни работи за предучилишниот процес. Училиштата имаат блокирани сметки, се позајмуваат средства од едно во друго училиште, а тоалетите се во трагична состојба. Ова не можеме да го дозволиме”.
Споделувајќи лична порака како родител, тој порача: „Имам мало дете кое оди во градинка и не можам да дозволам во една постела да лежат две или три деца. Не можам да дозволам ваков стандард за нашите деца”.
Во рамките на својата програма, Османи најави изградба на две нови градинки со највисоки стандарди, кои ќе бидат изработени од тимот на светски реномираниот архитект Мишел Ројкинд.
„Планираме две големи градинки, ‘Снежана’ и ‘Росица’, со најсовремени услови. Имам кредибилитет да зборувам за ова, затоа што веќе го реализиравме проектот за изградба на градинката ‘Бамби’, кој го одобрив како вице-премиер. Токму како што ја направивме ‘Бамби’, ќе ги изградиме и овие две нови градинки, и ќе ги реновираме сите постојни”, изјави Османи.
Тој ја истакна важноста од квалитетно образование, порачувајќи дека „никогаш не можеме да им ги вратиме изгубените години на едно дете“. По прес-конференцијата, Османи заедно со група наставници и наставнички, одржаа марш на промена и надеж, упатувајќи порака за квалитетно образование.
