Кандидатките за градоначалнички на Скопје и Карпош од СДСМ, Каја Шукова и Маја Мојсова, денеска од Млечен ресторан најавија воведување на паметни паркинзи со дигитална наплата во Општина Карпош. Тие сметаат дека моменталното бесплатно паркирање во голем дел од општината е причина за хаосот и недостатокот на места за жителите.
Каја Шукова истакна дека паркирањето и урбанизмот се врвен приоритет во нивната програма, особено во Скопје каде што граѓаните „кружат околу зградата по работниот ден барајќи слободно место“.
Мерките најавени од Шукова вклучуваат:
- Воведување паметни паркинзи со дигитална наплата.
- Создавање зони на периферијата поврзани со јавен превоз.
Субвенциониран паркинг преку стратегијата „Скопје за сите“ за семејства со ниски приходи, пензионери, млади невработени и лица со попреченост.
Разработка на стратегијата „Скопје 2050“ – долгорочна визија за паметен и одржлив град.
Шукова нагласи дека секој нов урбанистички проект ќе мора однапред да предвиди паркинг, зелени површини и простор за пешаци како предуслов, а не како последица.
Кандидатката за Карпош, Маја Мојсова, се пожали дека лично изгубила половина час барајќи паркинг кај Млечен, нејзиното поранешно маало. Таа ја објасни потребата од промена на системот:
„Сакаме Карпош да ја направиме самоодржлива општина. Тоа значи дека ние ќе стопанисуваме со паркингот, ќе треба да се исцртаат паркинг местата… Сето тоа ќе мора да биде и со некакво субвенционирање за граѓаните на Карпош, а за посетителите ќе биде со наплата. Тоа значи дека ќе работи по принципот на ПОЦ.“
Мојсова посочи дека најголемиот проблем е што деловите кои граничат со Центар се бесплатни, па посетителите на Центар го користат тој простор, правејќи хаос.
„Некако ќе мораме да го решиме тој проблем, граѓаните на Карпош се пред сите граѓани во оваа општина, да си го најдат паркинг местото и да доаѓаат без нервози дома“, рече Мојсова.
Таа вети дека урбанизацијата во тој дел на општината нема повеќе да ја дозволува и не ја исклучи можноста паркирањето да се решава со монтажни гаражи.
