Поранешната германска канцеларка Ангела Меркел во интервју за унгарскиот медиум „Партизан“ се осврна на конфликтот во Украина, откривајќи дека во 2021 година иницирала нов формат за директен дијалог со рускиот претседател Владимир Путин, но наишла на отпор од земјите членки на ЕУ.
„Во јуни 2021 година, почувствував дека Путин повеќе не го сфаќа сериозно Минскиот договор и затоа сакав нов формат, тогаш заедно со претседателот Макрон, каде што ќе разговараме директно со Путин како Европска Унија“, рече Меркел.
Таа тврди дека оваа иницијатива не била поддржана од некои членки. „Некои луѓе не го поддржаа. Тоа беа првенствено балтичките држави, но и Полска беше против него. Овие четири земји се плашеа дека нема да имаме заедничка политика кон Русија“, објасни Меркел.
„Во секој случај, новиот формат не се материјализираше. Јас ја напуштив функцијата, а потоа започна агресијата на Путин“, додаде поранешната канцеларка.
Меркел постојано нагласуваше колку е важно да се одржува дијалогот дури и меѓу спротивставените страни. Според неа, избувнувањето на пандемијата на коронавирусот предизвика прекин на многу комуникациски канали и затегнување на меѓународните односи, бидејќи видеоконференциите не се замена за разговорите лице в лице.
„Дали Путин ќе ја нападнеше Украина ако не се случеше пандемијата на коронавирус? Никој не може да каже. Коронавирусот ја промени светската политика затоа што повеќе не можевме да се среќаваме“, тврди таа.
Меркел истакна дека самиот Путин не учествувал на самитот на Г20 во 2021 година токму „од страв од пандемијата на коронавирус“.
„Ако не можете да се среќавате и да ги решавате разликите во мислењата, тогаш повеќе не можете да најдете нови компромиси. Видеоконференциите не се доволни во таква ситуација“, смета Меркел, која беше на функција од ноември 2005 до декември 2021 година.
