Претседателот на СДСМ, Венко Филипче, го повика премиерот Мицкоски да престане со, како што ги нарече, „спинови“ и да почне да се соочува со реалните економски проблеми во државата.
„Премиерот треба да престане да спинува. Има сериозни економски проблеми и прашања на кои треба да одговори. Кога човек нема што да каже, кога нема со што да се пофали – ниту проект, ниту добра прогноза за земјата – тогаш забегува кон вакви некакви лаги,“ изјави Филипче, одговарајќи на новинарско прашање во врска со изјавите на премиерот.
Лидерот на СДСМ оцени дека владата се соочува со сериозна економска стагнација, што, според него, го потврдуваат и меѓународните институции.
Филипче посочи на конкретни економски проблеми: „Нема раст, има пад на просечната плата, скок на цените на основните производи, затворање компании и луѓе кои секојдневно остануваат без работа.“
Наместо да се занимава со овие проблеми, Филипче обвини дека премиерот „измислува афери и скандали.“
Лидерот на СДСМ оцени дека државата оди кон економски колапс и дека е време владата да преземе одговорност.
„Време е оваа влада да сфати дека или треба да ја води државата како што треба – или да си оди. Граѓаните не заслужуваат незаинтересирана власт без резултати и без работа,“ порача Филипче.
