По случајот со пукањето кон докторот Зекирија Шаини во Куманово, Основното јавно обвинителство (ОЈО) Куманово соопшти дека е доставена кривична пријава за загрозување на сигурноста против едно лице, како и за поттикнување при извршувањето на тоа дело против поранешната сопруга на оштетениот.
Од ОЈО информираа дека пријавата се однесува на претходно испратени заканувачки пораки и закани.
Сепак, обвинителството нагласува дека сѐ уште се проверуваат индициите за евентуална инволвираност на овие, но и на други лица, во самиот инцидент со пукањето. Надлежен јавен обвинител постапува по пријавите и презема дејствија.
И покрај тоа што полициски службеници ја лишија од слобода 43-годишната А.А. од Тетово (поранешна сопруга на д-р Шаини), таа вчера беше ослободена од притвор бидејќи, како што соопшти обвинителството, немало докази да се поврзе нејзиното учество во обидот за убиство.
Полицијата, пак, интензивно трага по Љ.Ф. (36) од Гостивар, кој е осомничен како директен извршител на нападот и кој во моментот е во бегство.
