Јани Макрадули ја критикуваше изборната кампања на премиерот Христијан Мицкоски, обвинувајќи го дека локалните избори ги третира како парламентарни и дека се префрла од тема на тема бидејќи нема со што да се пофали пред граѓаните. Според Макрадули, Мицкоски им забранил на своите кандидати да одат на дебати за да не се „доизбрукаат“.
„Премиерот Мицкоски, веројатно уште кога почнале да ги снимаат спотовите, сфатил дека нема објект кој може да го покаже, нема инвестиција пред која може да се слика, па се префрли на други теми,“ вели Макрадули.
Макрадули тврди дека стратегијата на Мицкоски се состои од неколку фази:
Хибридни напади и „тајни странски центри“: Поради „гротеската“ во јавноста, оваа тема била напуштена.
Плашење со ДУИ: Кога сфатил дека тоа им го крева рејтингот на ДУИ, Мицкоски ја пуштил старата, „расипана плоча за СДСМ и Бугарија“. Притоа, додава Макрадули, неговите министри и директори во џеб ги кријат бугарските пасоши.
Најава за реконструкција: Поради слабата посетеност и „енергија нула“ на митинзите, Мицкоски најавил реконструкција на Владата за да го мотивира членството со ветување за нови позиции. Макрадули ова го нарекува „клиентелизмот пуштен на најјако“.
Предвремени избори и апсења: Бидејќи ни тоа не влече гласови, Мицкоски најавил предвремени избори (иако минатата недела изјавил дека „нема шанси“ да се случат) и го извадил „последниот адут“ – апсења.
Макрадули смета дека ваквиот изборен амбиент има цел да ги „забошоти“ реалните проблеми и скандали:
Меморандум со извршители: Со кој ќе се проверува дали пензионер купил повеќе од три чоколади.
Извештај на Светска банка: Кој покажува катастрофален финансиски капацитет на Владата, слабо прибирање даноци и недозволиво низок процент на реализирани капитални инвестиции (само 32% од планот до јули 2025).
Зголемување на ДДВ: Тема за која Макрадули вели дека нема да биде прашувана.
„Оваа кампања повторно нема да ги допре решенијата за реалните, секојдневни проблеми на граѓаните. Затоа, овој амбиент не смее да продолжи и по изборите. Ни треба доминација на активности од наученото од тешките муабети и конечно пресекување во корен на паролата: ‘Клиентелистите од сите страни – обединете се!’“, заклучи Макрадули.
