Министерството за здравство (МЗ) информира дека е во тек дистрибуцијата на бесплатните вакцини против сезонски грип низ јавните здравствени установи. Граѓаните од ризичните групи кои веќе се пријавиле ќе бидат известени СМС порака за нивниот термин за вакцинација во текот на оваа недела.
Вакцинацијата ќе се спроведува на вкупно 35 вакцинални пункта низ државата, од кои пет се наоѓаат во Скопје.
Министерството потсетува дека сѐ уште трае пријавувањето за бесплатна вакцинација. Граѓаните од ризичните групи можат да се пријават електронски преку веб-страницата vakcinacija.mk или преку својот матичен лекар.
Со бесплатната вакцинација се опфатени следните ризични категории население:
- Повозрасни лица над 65 години
- Лица со хронични заболувања
- Здравствени работници
- Бремени жени
- Деца на возраст од 6 месеци до 5 години
- Лица и вработени во установи за социјална заштита на стари лица
Министерството годинава набави 80.000 дози четиривалентна вакцина од реномираниот производител „Абот“ од Холандија, нагласувајќи дека вакцинацијата е најефикасна превентивна мерка за заштита на здравјето.
