Министерот за здравство, Азир Алиу, на денешната прес-конференција информираше дека, по разрешувањето на претходниот директор поради нарко-скандалот, за нов в.д. директор на Клиниката за неврологија е назначен д-р Јован Божиновски и се формираат повеќе комисии за надзор на работата на Клиниката.
Министерот Алиу појасни дека поранешниот директор, д-р Игор Кузмановски, е разрешен согласно Законот за здравствена заштита (член 111, став 1, т.4), поради нарушување на угледот на институцијата со објавениот компромитирачки видео-материјал од 10 октомври.
За нов в.д. директор е назначен д-р Јован Божиновски, кој е специјалист невролог и асистент на Медицинскиот факултет во Скопје.
Министерството за здравство презема серија мерки за целосен надзор на Клиниката:
- Формирана е комисија во рамките на Министерството.
- Побаран е инспекциски надзор од Државниот санитарен и здравствен инспекторат (ДСЗИ).
- Ќе биде формирана и интерна комисија за стручен надзор на Клиниката.
Министерот Алиу нагласи дека Министерството е во постојана комуникација со Лекарската комора во врска со целиот случај.
