Претседателот на ВМРО-ДПМНЕ, Христијан Мицкоски, на народниот митинг во Општина Лозово, остро ја критикуваше опозицијата, велејќи дека нивното разбирање за „се бориме за нашиот дом“ е фокусирано исклучиво на лично збогатување, наспроти државните интереси.
Во рамките на кампањата „Вистинскиот избор! Со твојот човек! За твоето место! За твојата иднина!“, Мицкоски изјави: „Имаа седум години можност да покажат и докажат дека навистина се борат за нивниот дом, т.е. нашиот заеднички дом, нашата татковина Македонија. Но видовме дека тие се борат само за нивните хациенди на Халкидики, во Дубаи и скапите јахти коишто ги возат за време на летото по Егејското крајбрежје. Тоа е за нив поимањето на терминот ‘се бориме за нашиот дом’“.
Мицкоски порача дека единствена алтернатива за Лозово и за Македонија е актуелниот и идниот градоначалник, Бошко Цветковски, и коалицијата предводена од ВМРО-ДПМНЕ.
Претседателот на ВМРО-ДПМНЕ се осврна на исполнувањето на трите суштински ветувања од парламентарните избори, истакнувајќи дека за 15 месеци власт:
Линеарно покачување на пензиите за вкупно 7.000 денари до март, надминувајќи го првично ветеното покачување од 5.000 денари.
Обезбедени се 500 милиони денари од Владата за општините, наменети за капитални проекти кои го подобруваат животот на граѓаните.
ДУИ е во опозиција и, според Мицкоски, „уште долго време ќе бидат во опозиција“ доколку останат нереформирани.
Мицкоски призна дека, иако знаеле за дел од проблемите при преземањето на власта, следело непријатно изненадување дека државата е речиси пред банкрот, а институциите и темелите на државата биле „комплетно разрушени“.
„Но, не очајуваме, туку ги засукаме ракавите и почнавме да работиме. А тоа е впрочем она коешто ние го ветувавме… многу работа, чесна и напорна,“ рече Мицкоски.
Тој повика масовно да се излезе на гласање на 19 октомври и да се гласа за ВМРО-ДПМНЕ со заокружување на бројот 9, за да продолжи работата и напредокот на државата.
