Остануваат уште три дена до изборниот молк пред локалните избори кои ќе се одржат на 19 октомври. Политичките партии, коалициите и независните кандидати и денеска ќе ги претставуваат своите програми и кандидати низ државата.
Коалицијата предводена од ВМРО-ДПМНЕ денеска ќе одржи митинзи и средби со граѓани во Пробиштип, Македонска Каменица, Пехчево, Берово и Делчево. Кандидатот за Градоначалник на Град Скопје, Орце Ѓорѓиевски, ќе одржи прес-конференција во 10:30 часот.
Коалицијата предводена од СДСМ ќе има митинзи во Центар Жупа, Дебар, Гостивар и Маврово Ростуше. Кандидатката за градоначалничка на Град Скопје, Каја Шукова, ќе даде изјава за медиумите во Пазар Радишани во 10:30 часот.
Левица ќе оствари средби со граѓани и ќе претставува кандидати во Радовиш и Струмица.
Независниот кандидат за градоначалник на Општина Гостивар, Висар Адеми, во 10:00 часот ќе ги претстави „Петте Ветувања за Гостивар“ за борба против корупцијата, отпадот и кучињата скитници.
Стопанската комора на Северо-Западна Македонија денеска ќе се сретне со независниот кандидат за градоначалник на Општина Струга, Менди Ќира, за да ја изложи својата Платформа за локален економски развој.
Кампањата завршува на 17 октомври на полноќ.
