Пратеникот Реџеп Исмаил од Левица остро ги демантираше тврдењата на ВМРО-ДПМНЕ за наводна соработка со ДУИ, откако во медиумите се појави фотографија на која тој е заедно со Муса Џафери во собраниската пушална. Исмаил ја нарече објавата „гнасни лаги“ и обид на ВМРО-ДПМНЕ да се извлече од револтот на народот поради „вртоголавиот пад на гласови“ на локалните избори.
Исмаил појасни дека станува збор за фотографија од пушален простор во Собранието каде се собираат сите пратеници-пушачи, без оглед на партиската припадност.
Тој ја оспори актуелноста и целта на фотографијата со три клучни поенти:
- Локација: „Во бифето на Собранието се собираме сите пушачи-пратеници и сите седиме каде што ќе најдеме место за да пушиме цигари, оти нема друго место каде да се пуши.“
- Датум и извор: Фотографијата е направена некаде во мај–јуни 2025 година, а претходно била објавена од ВЛЕН за „портретирање на Левица како антиалбанска“.
- Контекст со Џафери: Муса Џафери е претседател на Комисијата за надворешна политика, каде што Исмаил е член. Тој нагласи дека Декларацијата на Левица за признавање на Палестина е блокирана во таа комисија веќе една година, бидејќи ја саботираат „ционистичките пиуни од ВЛЕН, ДУИ и ДПМНЕ“.
Исмаил додава дека скоро секогаш го прашува Џафери дали декларацијата ќе биде на дневен ред пред закажана седница.
На крајот, пратеникот заклучи дека ширењето на вакви „гнасотилуци“ е разбирливо кога нема што да се понуди и сите изговори се потрошени.
„На крај, сепак — ние ќе победиме!“, порача Исмаил.
